top of page

業界議題

校本言語治療計劃 爭議

有冇諗過有咁多校本言語治療師(SBST)岀糧都唔足point,而舊老細又叫極都唔肯出工作證明?

教育局喺上年推出咗校本言語治療計劃,佢哋差唔多任何非主流小學嘅工作經驗都計,但係偏偏就唔計以往喺主流小學工作嘅同工嘅年資,除非佢哋有舊老細嘅工作證明。仲要計都要同你計到盡你嗰年有幾多時數係做緊學校。

校本言語治療服務計劃原意係提供更全面嘅服務畀學校,但計劃推行前後,業界都發現存在唔少問題,包括上面提到有關年資嘅問題,亦有唔少剝削言語治療師嘅情況出現。有見及此,工會早前推岀咗《工作安排問卷調查》去集合各位SBST嘅意見,亦喺2020年10月29日發送電郵俾教育局言語治療服務組,要求就改善計劃同工會理事同埋喺主流學校工作嘅同工進行對談。

等咗三個星期,我哋終於收到EDB嘅reply。可惜,佢哋嘅答覆只係政府部門一貫嘅「遊花園」回應,完全冇意欲同誠意去解決現時計劃入面遇到嘅問題。

理事總結咗EDB嘅回覆內容畀大家參考:

1)落實計劃前,唔同持份者(包括ST)對推行計劃有「正面嘅回應」

(按:其實業界好多熱心ST(可參考 言語治療資助服務關注組 )喺落實計劃前已經講咗好多好多次:EDB並冇全面噉諮詢業界!又假設EDB真係有諮詢到,但諮詢數據缺從來都冇公開過。而相信有出席29/1/2019簡介會嘅同工都記得,當日EDB言語治療服務組可以話係冇正面回應過業界同學校嘅憂慮,只係一尾硬推SBST計劃。 有關詳情 言語治療資助服務關注組 已經喺佢哋嘅Facebook專頁解釋得好清楚。)

2)現時年資認受、薪金審批等程序「運作暢順」

(按: 有啲舊老細唔肯出書面證明,EDB又唔收學校證明,唔少同工嘅實際年資同薪酬有差異,有同工嘅薪點甚至被計少7年!)

 

3) SBST有咩問題都好,一係自己同校方講,一係同specialist(專責教育主任)講,現時已經有完善嘅機制!

(按:其實學校得一個ST,自己同校方/透過specialist講只會係困獸鬥...如果現時有嘅機制已經完善,點解仲會有ST被學校壓榨嘅情況出現?)

由於EDB堅持計劃冇問題,理事而家會收集ST針對計劃想講嘅說話,再將說話原文send畀EDB(放心,唔會開名),亦可能會喺社交媒體上面公佈,期望達施壓嘅作用。歡迎業界所有同工(SBST/非SBST)填寫以下表格:

https://docs.google.com/....../1oNqhXmRKdZ....../edit

SBST_1.jpg
SBST_2.png

繼上次理事Facebook簡短回應咗EDB就校本言語治療計劃(SBST)跟進事宜嘅回覆後,有唔少同工聯絡理事詢問有關細節。

有見及此,我哋希望透過呢幾幅圖,畀同工明白其實相關計劃有咩問題,工會又點解會作出跟進,同時又期望EDB可以做到啲咩。

理事亦已回覆EDB嘅電郵,將同工反映嘅意見同工會嘅訴求清楚噉列明畀EDB睇(詳情可以參考comment 嘅截圖)。計劃執行問題導致現時大量學校都未能夠如期請到校本言語治療師,學校亦難以聘請有資歷嘅治療師,最後影響嘅只會係服務使用者。

 

理事希望EDB可以正視問題,應邀出席同工會及各位同工嘅面談,並回應工會嘅訴求,亦請同工繼續關注事態發展。

校本言語治療計劃 爭議

2019-2020年度​工作安排問卷

理事會希望了解各位同工對工作的滿意度及當中可能涉及的勞資問題,因此誠邀所有於本年度(2019-2020年度)於香港任職的言語治療師填寫問卷。問卷裡亦設有關於武漢肺炎僱主應對的措施,如會員對現時僱主的應對有任何意見可於問卷裡反映,方便理事跟進。

詳細問卷調查結果請留意早前工會發給各會員的電子郵件。

2019-2020年度​ 工作安排問卷
bottom of page